बयलपाटा अस्पताललाई प्रदेश मातहतमा ल्याउने प्रक्रिया अघि बढ्यो

धनगढी । अछाममा रहेका बयलपाटा अस्पताललाई प्रदेश मातहत ल्याउने प्रक्रिया अघि बढेको छ ।

सामाजिक विकास मन्त्रालयले बयलपाटा प्रादेशिक अस्पताल सञ्चालन तथा व्यवस्थापनको लागि गठन आदेश तयार गरी मन्त्रीपरिषद  बाट स्वीकृत गरेर राजपत्रमा प्रकाशन समेत गरेको छ ।

अस्पताल सञ्चालनको लागि प्रदेश सरकारले ५० शैया  र २०८२ श्रावण मसान्त सम्म स्वास्थ्य संस्था सञ्चालन मापदण्ड २०७७ बमोजिम संगठन संरचना तथा दरबन्दी व्यवस्थापन गरी सर्वेक्षण गरी जनशक्ति व्यवस्थापनको कार्य सम्पन्न गरी सम्झौता बमोजिम २०८२ भाद्र १ देखि सञ्चालनमा ल्याउने राजपत्रमा उल्लेख छ ।

प्रदेश सरकारले करारमा जनशक्ति भर्ना गर्ने र स्वीकृत दरबन्दीको स्थायी पदपूर्ति प्रदेश लोकसेवाले गर्ने उल्लेख छ ।

कर्मचारी पदपूर्ति गर्दा बयलपाटा अस्पतालमा कार्यरत रहेका सम्बन्धित पद वा तहका जनशक्तिलाई आन्तरिक प्रतिष्पर्धामा ७० प्रतिशत र खुला प्रतिष्पर्धामा ३० प्रतिशतमा अस्पतालमा कार्यरत र योग्यता पुगेका जनशक्ति पनि सहभागी हुन पाउने राजपत्रमा उल्लेख छ ।

अस्पतालको कार्यकारी निर्देशक मन्त्रिपरिषद्ले नै नियुक्त गर्ने र पदावधि ३ वर्ष रहने पनि राजपत्रमा उल्लेख छ ।

अस्पताल वयबस्थापन समितिको अध्यक्ष  अस्पताल रहेको स्थानीय तहको प्रमुखलाई अध्यक्ष बनाइने राजपत्रमा उल्लेख गरेको छ ।