डडेल्धुरा अस्पताल : खरिद ऐन विपरित उपकरण खरीदको प्याकेज नै ‘लक’

काठमाडौं । डडेल्धुरा अस्पतालले चालु आर्थिक वर्ष २०८२/०८३ मा खरिद गर्न लागेको विभिन्न स्वास्थ्य उपकरणहरुको प्याकेज नै लक गरेको पाइएको छ ।

असोज दोश्रो साता अस्पतालले २ प्याकेजमा विभिन्न उपकरणको खरीद प्रक्रिया अगाडि बढाएसँगै उपकरण खरिदको प्याकेज नै लक गरेको पाइएको हो ।

पहिलो प्याकेजमा एक्सरे मेसिन र डिआर, पोर्टटेबल एक्सरे, पोर्टेबेल अल्ट्रासाउण्ड, प्यासेन्ट मोनिटर र मोनिटर ओटी टेबल राखिएको छ ।

दोस्रोमा, बायोकेमेष्ट्री एनालाईजर, ओटी लाईट, ईसिजी मेसिन नेबुलाईजनर, बिरामी जाँच गर्ने बेड, ईलेक्ट्रो सर्जिकल युनिट, सेन्ट्रीफ्युज मेसिन, ड्राई बाथ, ब्लड रोलर, माईक्रोस्कोप, रेडीयन्ट बार्मर जस्ता उपकरण राखिएका छन् ।

अस्पतालले उक्त खरीद प्रक्रियामा सार्वजनिक खरीद नियमावली ३ (क) मा गरीएका व्यवस्था उल्लंघन गरेको छ । नियमावलीमा भनिएको छ, एक आपसमा अन्तर सम्बिन्धत भई एउटै प्याकेजमा संचालन गर्नुपर्ने भएमा बाहेक प्रतिस्र्धीलाई संकुचित र सिमित गर्ने गरी ठुल–ठुला प्याकेज बनाई बोलपत्र आह्वान गर्नु हुँदैन ।

तर, डडेल्धुरा अस्पतालले भने खरीद नियमावली विपरित प्याकेजिङ गरी स्वास्थ्य उपकरण खरीद प्रक्रिया अगाडी बढाएको हो ।

अस्पतालले स्वास्थ्य सामाग्री खरीद प्रक्रियामा रेडीयोलोजि विभाग, प्रयोगशाला विभागसँगै आईसियू, एनआईसियुका जनरल प्रकृतिका उपकरणहरु नछुट्याई प्याकेजिङ गरेको छ । प्याकेजिङ एकमा रेडीयोलोजि विभागका उपकरणसँगै आईसियूका उपकरणहरु राखिएको छ ।

त्यसैगरी, दोस्रो प्याकेजमा प्रयोगशाला, एनआईसियु, ओ टीका उपकरणसँगै फर्निचरका सामाग्रीहरु समेत राखिएको छ ।

यता, डडेल्धुरा अस्पतालका खरिद समिति संयोजक कृष्ण प्रसाद जैशीले बजेटको शिर्षक अनुसार नै उपकरण खरिद प्रक्रिय अगाडि बढाएको दाबी गरे । ‘विनियोजित बजेट शीर्षकमा जे उपकरण खरिद गर्न भनिएको छ, सो अनुसार नै प्याकेज बनाइएको हो’ उनले भने ।