सुदूरपश्चिम प्रदेशका अस्पतालहरू व्यवस्थापन समिति विहीन

धनगढी । सुदूरपश्चिम प्रदेश सरकार मातहत रहेका प्रादेशिक अस्पताल सँगै जिल्ला अस्पतालहरू व्यवस्थापन समिति विहीन बनेका छन् । अघिल्लो सरकारले नियुक्त गरेको अस्पताल व्यवस्थापन समितिहरूको कार्यकाल सकिएको २ महिना हुनै लाग्दा समेत  नियुक्तिको प्रक्रिया अगाडी बढ्न सकेको छैन ।

सुदूरपश्चिम प्रदेश सरकार मातहत रहेका ३ प्रादेशिक अस्पतालहरूमा सेती प्रादेशिक अस्पताल, महाकाली प्रादेशिक अस्पताल र टीकापुर प्रादेशिक अस्पतालका साथै जिल्ला अस्पताल बैतडी, दार्चुला, डोटी , अछाम, बाजुरा र बझाङ अस्पताल व्यवस्थापन समिति विहीन बनेका हुन् ।

सत्ता गठबन्धनका दल नेपाली काँग्रेसका प्रमुख सचेतक विक्रम सिंह धामीले विभिन्न चरणका छलफल पछि सहमति भइसकेको बताए । उनले भने, प्रमुख प्रतिपक्षी दलको संसद्मा भईरहको अवरोधका कारणले नियुक्तिमा ढिलाइ भएको र छलफलमा भएको विषयमा औपचारिक निर्णय हुन मात्रै बाँकी रहेको बताए ।

त्यसै गरी, नेकपा एमालेका प्रमुख सचेतक चक्र बहादुर मल्लले अस्पताल व्यवस्थापन समितिका पदाधिकारी नियुक्तको विषय छलफल भए पनि आधिकारिक निर्णय भई नसकेको बताए ।

सामाजिक विकास मन्त्री मेघराज खड्काले अस्पताल विकास समितिका पदाधिकारी नियुक्तको विषय छलफलको क्रममा रहेकाले चाँडै नै टुङ्गिने बताए ।

प्रदेश मातहत रहेका अस्पताल सँगै प्रदेश खेलकुद परीषद र प्रदेश युवा परीषद समेत नेतृत्व विहीन छन् ।