Techie IT
  • शुक्रबार, मंसीर ५, २०८३ / Friday, November 20, 2026
गृहपृष्ठ ∕ मुख्य समाचार ∕ अनुमतिबिना सञ्चालित स्वास्थ्य संस्था बन्द गर्न आग्रह

अनुमतिबिना सञ्चालित स्वास्थ्य संस्था बन्द गर्न आग्रह


काठमाडौं । नेपाल मेडिकल काउन्सिलले दर्ता वा सञ्चालन अनुमति नलिई सञ्चालनमा रहेका स्वास्थ्य संस्थाको तत्काल पहिचान गरी बन्द गर्न तथा कानुनबमोजिम कारबाही अघि बढाउन तीन तहकै सरकारलाई आग्रह गरेको छ ।

नेपाल मेडिकल काउन्सिलका निमित्त रजिस्ट्रार डा.दिपेन्द्र पाण्डेले खाद्य स्वच्छता मन्त्रालय, सबै प्रदेशका स्वास्थ्य तथा सामाजिक विकास मन्त्रालय, स्वास्थ्य निर्देशनालय, स्थानीय तहलगायत निकायलाई पत्राचार गर्दै देशभरका धेरै स्वास्थ्य संस्था कानुनबमोजिम सञ्चालन अनुमति नलिई सञ्चालनमा रहेको पाइएकोले यस्तो आग्रह गरेका छन् ।

गुनासो अनुसार नै धेरै स्वास्थ्य संस्था दर्ता विना नै सञ्चालित भएको, मापदण्ड पुरा नगरेको पाइएकोले तीन तहका सरकारी निकायलाई पत्राचार गरेका पाण्डेको भनाइ छ ।

काउन्सिलका अनुसार सञ्चालन अनुमति प्राप्त गरेका केही स्वास्थ्य संस्थामा समेत तोकिएको न्यूनतम भौतिक पूर्वाधार, आवश्यक उपकरण तथा योग्य र दक्ष जनशक्तिको अभाव देखिएको छ ।

स्वास्थ्य संस्था स्थापना र सञ्चालनको अनुगमन गर्ने अधिकारक्षेत्र भएका निकायलाई आफ्नो कार्यक्षेत्रभित्र सक्रिय अनुगमन गर्न काउन्सिलले अनुरोध गरेको छ ।

दर्ता वा सञ्चालन अनुमति नलिई सञ्चालित स्वास्थ्य संस्थालाई तत्काल बन्द गर्न वा नियमानुसार कारबाही गर्न पत्रमा उल्लेख गरिएको छ ।

त्यस्तै, सञ्चालन अनुमति प्राप्त भए पनि तोकिएको न्यूनतम मापदण्ड पूरा नगरेका संस्थालाई सुधारका लागि निर्देशन दिन र सुधार नभए नियमानुसार कारबाही गर्न आग्रह काउन्सिलले गरेको छ ।

नागरिकको स्वास्थ्य अधिकार, बिरामीको सुरक्षा तथा गुणस्तरीय स्वास्थ्य सेवा प्रवाह सुनिश्चित गर्न आवश्यक समन्वय र प्राविधिक सहकार्य गर्न काउन्सिल प्रतिबद्ध रहेको जनाएको छ ।

Screenshot


तपाईको प्रतिक्रिया

ताजा अपडेट


यो पनि पढनुहोस

error: Content is protected !!