प्रदेश आयूर्वेद चिकित्सालयमा औषधी अभाव

तनहुँ। तनहुँको सदरमुकाम दमौलीस्थित प्रदेश आयूर्वेद चिकित्सालयमा औषधीको अभाव छ । बजेट कटौती हुँदा आवश्यकता अनुसारको औषधी खरिद गर्न नपाउँदमा अभाव भएको हो ।

औषधीको अभाव हुँदा बिरामीहरू रित्तो हात फर्किएर बाहिर किन्नुपर्ने बाध्यता छ । औषधीको लागि थोरै रकम विनियोजित भई आएकोले समस्या परेको प्रदेश आयूर्वेद चिकित्सालयका वरिष्ठ कविराज निरीक्षक शम्भु चापागाईले जानकारी दिए।

स्वेदन यन्त्र, पञ्चकर्म र क्षारसूत्र विधिबाट विभिन्न रोगको सफल उपचार गरेपछि आयुर्वेदिक उपचारतर्फ आकर्षण बढ्दै गएको बेला औषधी अभाव हुँदा समस्या परेको बताउनुहुन्छ । चापागाईले भने, “एलोप्याथिक विधिबाट लामो समय उपचार गरेर थकित भएका बिरामीलाई पनि निको बनाएर पठाएकाले बिरामी चाप बढेको छ तर औषधिको बजेट कटौती हुँदा सेवा प्रभावकारी बनाउन कठिन भएको छ ।’’

बिरामीको सङ्यामा वृद्धि भइरहेकोले औषधीको लागि रकम थप गर्नुपर्नेमा पहिलेभन्दा आधा कम रकम पठाएकोले अभाव झेल्नु परेको कार्यालय प्रमुख आयूर्वेद चिकित्सक डाक्टर नारायण श्रेष्ठले बताए । आर्थिक वर्ष २०७९–८० मा वार्षिक रूपमा औषधी खरिदको लागि १८ लाख रुपियाँ विनियोजन गरिएकोमा आर्थिक वर्ष २०८०/८१ मा आठ लाख १० हजार र चालु आर्थिक वर्ष २०८१(०८२ मा आठ लाख रुपियाँ मात्रै पठाएकोले औषधीको अभाव भएको उनले जानकारी दिए ।

डा श्रेष्ठले भने, “बिरामी झण्डै दोब्बर बढेकाले ३६ लाख रुपियाँ विनियोजन गर्नुपर्ने आठ लाख मात्रै विनियोजन गर्दा समस्या परेको छ ।’’

अधिकांश पायल्स, ढाडको समस्या, जन्डिस, ग्यास्ट्रिक, दमखोकी, हाडजोर्नी, नसा, आवाज रोकिने, श्वासप्रश्वास सम्बन्धी समस्या भएका, बाथ, प्रसूति, बमनथेरापी, अम्लपित्त लगायत सेवा लिने बिरामी आउने चिकित्सालयले जनाएको छ । दैनिक करिब एक सय जना बिरामी आउने गरेका छन् ।