सुदूरपश्चिममा पहिलो पटक आईभिएफ सेवा सुरु

धनगढी । सुदूरपश्चिम प्रदेशमा पहिलो पटक निजी क्षेत्रको पहलमा प्रजनन स्वास्थ्यसम्बन्धी अत्याधुनिक उपचार सेवा आईभिएफ सञ्चालनमा आएको छ ।

कैलालीको धनगढी उपमहानगरपालिका–४, सहिद गेटमा सन्तती आईभिएफ एण्ड फर्टिलिटी सेन्टर औपचारिक रूपमा सञ्चालनमा आएको हो ।

यस सेन्टरले सन्तान नहुनु (निःसन्तानपन) सम्बन्धी समस्याको उपचारका लागि IVF, IUI, ICSI लगायतका आधुनिक प्रजनन स्वास्थ्य सेवाहरू प्रदान गर्ने जनाइएको छ ।

यसबाट सुदूरपश्चिमका दम्पतीहरूलाई अब उपचारका लागि काठमाडौँ वा अन्य ठूला सहर जानुपर्ने बाध्यता कम हुने अपेक्षा गरिएको छ । आईभिएफ सेन्टरको सेवा शुभारम्भको अवसरमा माघ ९ र १० गते दुईदिने प्रजनन स्वास्थ्यसम्बन्धी निःशुल्क स्वास्थ्य शिविर समेत आयोजना गरिएको छ ।

उक्त शिविरमा नेपाल आईभिएफ सेन्टर, काठमाडौँकी निःसन्तान रोग विशेषज्ञ डा। रक्षा पराजुलीले दम्पतीहरूको स्वास्थ्य परीक्षण तथा परामर्श सेवा प्रदान गरिरहेकी छन् ।

सन्तती आईभिएफ एण्ड फर्टिलिटी सेन्टर धनगढीका अनुसार शिविरमार्फत प्रजनन स्वास्थ्यबारे जनचेतना अभिवृद्धि गर्नुका साथै सन्तान नहुनुको कारण पहिचान गरी उचित उपचारतर्फ दम्पतीहरूलाई मार्गदर्शन गर्ने उद्देश्य रहेको छ ।

स्थानीय स्तरमै गुणस्तरीय र विश्वसनीय प्रजनन स्वास्थ्य सेवा उपलब्ध भएपछि सुदूरपश्चिम क्षेत्रका नागरिकहरू ठूलो रूपमा लाभान्वित हुने विश्वास गरिएको छ ।