बयालपाटा प्रादेशिक अस्पतालः प्रदेश सरकारद्वारा कर्मचारी नियुक्त

धनगढी । सुदूरपश्चिम प्रदेश सरकारले आफ्नो मातहतमा ल्याएको अछामको बयालपाटा अस्पतालका लागि कर्मचारी नियुक्त गरेको छ ।

न्याय हेल्थ नेपालले संचालन गरेको बयालपाटा अस्पताललाई आफ्नो मातहतमा ल्याएको प्रदेश सरकारले केही कर्मचारी नियुक्त गरेको हो, भने केहीको प्रक्रिया जारी छ ।

प्रदेश सरकारले अस्पताल व्यवस्थापन गर्न संचालन तथा व्यवस्थापन गर्न गठन आदेश ल्याई मन्त्रीपरीषद्बाट अस्थायी दरबन्दी स्वीकृत गरी सो प्रक्रिया अगाडी बढाएको हो ।

गठन आदेशमा व्यवस्था भए अनुसार प्रदेश सरकारले सो अस्पतालमै कार्यरत कर्मचारीहरुबाट आन्तरीक प्रतिस्पर्धा गराई ६५ जना कर्मचारी नियुक्त गरेको छ ।

सामाजिक विकास मन्त्रालयले सिफारिस गरेको सुचिमा मेडीकल अधिकृत, मेडीकल ल्याब टेक्नोलोजिष्ट, सर्भिलेन्स अधिकृत, स्टाफ नर्स, हेल्थ असिस्टेन्ट फार्मेशी साहायक, ल्याब टेक्निसियन, रेडीयोग्राफर, एनेस्थेटीक साहायक कम्प्युटर अपरेटर, अ हे व, अ न मी, कोल्डचेन साहायक, हलुका सवारी चालक, सरसफाईकर्मि, सुरक्षागार्ड र कार्यालय सहयोगीहरु  नियुक्त गरेको छ ।

प्रदेश सरकारले ल्याएको अस्पतालको गठन आदेश अनुसार आन्तरीक प्रतिस्पर्धाबाट ७० प्रतिशत र खुला प्रतिस्पर्धाबाट ३० प्रतिशत जनशक्तिहरु व्यवस्थापन गर्नुपर्ने छ । सो अनुसार नै आन्तरीक तर्फको कर्मचारी भर्ना प्रक्रिया सकिएको र खुला प्रतिस्पर्धाको लागि विज्ञापन गर्ने तयारी भईरहेको सामाजिक विकास मन्त्रालयले जनाएको छ ।

अस्पताल निर्देशक नियुक्त गर्ने तयारी

बलयपाटा प्रादेशिक अस्पताल संचालन तथा व्यवस्थापन गठन आदेशमा अस्पताल संचालनको लागि कार्यकारी निर्देशकको व्यवस्था गरिएको छ ।

गठन आदेशमा आवेदकहरु मध्येबाट छनोट गरेको व्यक्तिलाई प्रदेश सरकारको मन्त्रीपरिषद्ले नियुक्त गर्ने उल्लेख छ ।

सुदूरपश्चिम प्रदेश सरकारले तत्कालिन बयालपाटा अस्पतालका मेडीकल निर्देशक डा. मन्दिप पाठकलाई बयालपाटा प्रादेशिक अस्पतालको कार्यकारी निर्देशक तोक्ने तयारी गरेको छ ।

डा. पाठक अर्थोपेडीक सर्जन हुन् । प्रदेश सरकारको मन्त्रीपरीषद् बैठकले कार्यकारी निर्देशक नियुक्त गर्ने बताइएको छ ।