औषधि व्यवसायी संघ सुदूरपश्चिमको चौथो वार्षिक साधारणसभा सम्पन्न

धनगढी ।  ‘औषधिको सही सदुपयोग गरौँ, प्रतिकूल असरबाट बचाऔँ’ भन्ने मूल नारासहित नेपाल औषधि व्यवसायी संघ सुदूरपश्चिम प्रदेशको चौथो वार्षिक साधारणसभा सम्पन्न भएको छ।

साधारणसभामा सुदूरपश्चिमका नौवटै जिल्लाका औषधि व्यवसायीहरूको सहभागिता रहेको थियो।

कार्यक्रमका प्रमुख अतिथि प्रा. डा. शुभेषराज कायस्तले विगत ४० वर्षदेखि नियमित रूपमा स्वास्थ्य सेवामा सक्रिय रहँदै आएको अनुभवसाझा गर्दै सुदूरपश्चिमको समग्र स्वास्थ्य अवस्थाबारे आफू जानकार रहेको बताए। उनले स्वास्थ्य सेवामा योगदान पुर्‍याइरहेका सम्पूर्ण सुदूरपश्चिमेलीलाई धन्यवाद व्यक्त गर्दै औषधिको सुरक्षित र जिम्मेवार प्रयोग आजको आवश्यकता भएको उल्लेख गरे ।

औषधि व्यवस्था विभागका प्रतिनिधि दिनेश न्यौपानेले औषधि सम्बन्धी ऐन–नियमको परिधिभित्र रहेर मात्र औषधिको बिक्री–वितरण गर्नव्यवसायीहरूलाई आग्रह गरे । कानुनभन्दा माथि कोही पनि नरहेको उल्लेख गर्दै उनले कानुन विपरीत औषधि बिक्री–वितरण भएको पाइए कारबाहीको दायरामा ल्याइने स्पष्ट पारे ।

सभाका अध्यक्ष तथा नेपाल औषधि व्यवसायी संघ सुदूरपश्चिम प्रदेशका अध्यक्ष गजेन्द्र लेखकले सुदूरपश्चिमका दुर्गम क्षेत्रमा समेत औषधि सेवा पुर्‍याउन व्यवसायीहरू सक्रिय रहेको उल्लेख गरे । उनले आफ्नो पेशालाई मर्यादित, जिम्मेवार र अनुशासित रूपमा सञ्चालन गर्नसबैलाई आग्रह गरे ।

अध्यक्ष लेखकले देश संघीयतामा गइसकेको अवस्थामा पनि नेपाल औषधि व्यवस्था विभागले सुदूरपश्चिम, कर्णाली र लुम्बिनी गरी तीन प्रदेश हेर्नुपर्दा अनुगमन समयमै हुन नसकेको गुनासो ब्यक्त गरे । उनले सुदूरपश्चिम प्रदेशका लागि धनगढीमै औषधि व्यवस्था विभागको कार्यालय स्थापना गर्न माग गर्दै ऐन–नियम व्यवसायीमैत्री हुनुपर्ने धारणा राखे ।

कार्यक्रममा औषधि व्यवसायमा योगदान पुर्‍याएको भन्दै भट्ट मेडिकल स्टोर बैतडीका भोजराज भट्ट र सरोज मेडिकल हलका कमल सिंह शाहुलाई सम्मान गरिएको थियो।

साधारणसभाले औषधिको सही प्रयोग, गुणस्तरीय सेवा र व्यवसायिक मर्यादा कायम गर्दै सुदूरपश्चिमको स्वास्थ्य प्रणालीलाई थप सुदृढ बनाउने प्रतिबद्धता व्यक्त गरेको आयोजकले जनाएका छन्।