सेती प्रादेशिक अस्पतालमा बिग्रिएको सिटी स्क्यान आपूर्तिकर्तालेनै मर्मत गर्दै

धनगढी । सेती प्रादेशिक अस्पतालमा विगत तीन सातादेखि बिग्रिएको सिटी स्क्यान मेसिन मर्मतका लागि आवश्यक सामग्री नेपाल आइपुगेको छ। मेसिन वारेन्टी अवधिमै रहेकाले आपूर्तिकर्ता कम्पनीले नै मर्मत गर्न लागेको अस्पतालले जनाएको छ।
अस्पतालका अनुसार सिटी स्क्यान मेसिन मर्मतका लागि आवश्यक पार्टपुर्जा नेपाल आइपुगेपछि मर्मत प्रक्रिया अघि बढाइएको हो। वारेन्टी अवधिमा रहेकाले मर्मतको सम्पूर्ण जिम्मेवारी आपूर्तिकर्ता कम्पनीकै हुने अस्पतालले जनाएको छ।
मेसिन आपूर्ति गरेको म्याक्स मेडिकेयरका अनुसार सिटी स्क्यान मेसिनले वारेन्टीमा तोकिएको क्षमताभन्दा करिब तीन गुणा बढी काम गरिसकेको छ। कम्पनीका अनुसार अत्यधिक प्रयोगका कारण मेसिनमा समस्या आएको हो।
सिटी स्क्यान सेवा अवरुद्ध हुँदा सेती प्रादेशिक अस्पतालमा उपचारका लागि आउने बिरामीलाई समस्या हुँदै आएको छ। मेसिन मर्मत भएपछि सेवा नियमित सञ्चालनमा आउने अस्पतालले जनाएको छ।