निजी स्वास्थ्य संस्थामा संयुक्त अनुगमन : २ संस्थालाई सेवा बन्द गर्न निर्देशन

धनगढी । कैलालीको धनगढीमा सञ्चालनमा रहेका निजी स्वास्थ्य संस्थाहरूको संयुक्त अनुगमनका क्रममा सेवा सञ्चालनको स्वीकृति नलिएका दुई संस्थालाई सेवा बन्द गर्न निर्देशन दिइएको छ।
जिल्ला स्वास्थ्य कार्यालय कैलाली, जिल्ला प्रशासन कार्यालय कैलाली, उद्योग, वाणिज्य, आपूर्ति तथा उपभोक्ता संरक्षण कार्यालय धनगढी र औषधि व्यवस्था विभाग, नेपालगन्जको संयुक्त टोलीले धनगढीका विभिन्न निजी स्वास्थ्य संस्थामा अनुगमन गरेको हो।
अनुगमनका क्रममा धनगढी उपमहानगरपालिका–१ मा रहेको श्रिद्धि डाइग्नोस्टिक सेन्टर र सहिद गेटमा रहेको सन्तति आईभीएफ सेन्टरले सम्बन्धित निकायबाट सेवा सञ्चालनको स्वीकृति नलिएको पाइएको टोलीले जनाएको छ।
स्वीकृति नलिई स्वास्थ्य सेवा सञ्चालन गरेको पाइएपछि दुवै संस्थालाई तत्काल सेवा बन्द गर्न निर्देशन दिइएको हो।
अनुगमन टोलीले निजी स्वास्थ्य संस्थाहरूले प्रचलित कानुन तथा मापदण्डअनुसार आवश्यक अनुमति लिएर मात्रै सेवा सञ्चालन गर्नुपर्नेमा जोड दिएको छ। अनुगमनलाई आगामी दिनमा पनि निरन्तरता दिइने जनाइएको छ।