शहीद दशरथ चन्द स्वास्थ्य विज्ञान विश्वविद्यालयमा चिकित्सा शिक्षा कार्यक्रम सञ्चालन अनुमति र सिट निर्धारणका लागि आयोगको अनुगमन

कैलाली । कैलालीको गेटास्थित शहीद दशरथ चन्द स्वास्थ्य विज्ञान विश्वविद्यालयमा चिकित्सा शिक्षा कार्यक्रम सञ्चालनका लागि अनुमति तथा विद्यार्थी सिट संख्या निर्धारण गर्न चिकित्सा शिक्षा आयोगको टोलीले अनुगमन गरिरहेको छ।
चिकित्सा शिक्षा कार्यक्रम सञ्चालनका लागि आवश्यक पूर्वाधार, जनशक्ति, शिक्षण संस्था तथा शिक्षण अस्पतालको अवस्थालगायतका विषयमा आयोगको टोलीले स्थलगत अनुगमन गरिरहेको हो।

आयोगको टोलीले मंगलबार विश्वविद्यालय परिसर, शिक्षण संस्था तथा शिक्षण अस्पतालको अनुगमन गर्ने कार्यक्रम रहेको छ। त्यसैगरी विश्वविद्यालय र सुदूरपश्चिम प्रदेश सरकारबीच भएको सम्झौताअनुसार प्रदेश सरकार मातहत रहेको सेती प्रादेशिक अस्पतालमा समेत आयोगको टोलीले अनुगमन गर्नेछ।

गेटामा स्वास्थ्य विज्ञान विश्वविद्यालय स्थापना भएसँगै सुदूरपश्चिममा चिकित्सा शिक्षा विस्तारको बाटो खुलेको भए पनि कार्यक्रम सञ्चालनका लागि आवश्यक प्रक्रिया पूरा गर्नुपर्ने अवस्था छ। आयोगको अनुगमनलाई विश्वविद्यालयमा चिकित्सा शिक्षा कार्यक्रम सञ्चालनतर्फको महत्वपूर्ण प्रक्रियाका रूपमा हेरिएको छ।