शहीद दशरथ चन्द स्वास्थ्य विज्ञान विश्वविद्यालयको उपकुलपतिमा ४ र रजिस्ट्रारमा १९ जनाको दाबी

धनगढी । शहीद दशरथ चन्द स्वास्थ्य विज्ञान विश्वविद्यालयको उपकुलपति र रजिस्ट्रार पदका लागि आवेदन दिने प्रक्रिया सकिएको छ । शिक्षा, विज्ञान तथा प्रविधि मन्त्रालयका अनुसार उपकुलपति पदमा ४ जना र रजिस्ट्रार पदमा १९ जनाको दरखास्त परेको छ ।

मन्त्रालयले केही समयअघि सार्वजनिक सूचना जारी गर्दै दुवै पदका लागि योग्य उम्मेदवारबाट आवेदन आह्वान गरेको थियो । उपकुलपति र रजिस्ट्रार पदका लागि उमेर हद समान राखिएको थियो ।

सूचनाअनुसार आवेदन दिने अन्तिम दिनसम्म न्यूनतम ३५ वर्ष उमेर पूरा भई अधिकतम ६१ वर्ष ननाघेको हुनुपर्ने व्यवस्था गरिएको थियो । सोही मापदण्डअनुसार आवेदन परेको मन्त्रालयले जनाएको छ ।

अब प्राप्त आवेदनहरूको प्रारम्भिक अध्ययन, आवश्यक कागजात परीक्षण तथा सर्टलिस्ट तयार गर्ने प्रक्रिया अघि बढाइने मन्त्रालयको भनाइ छ । सर्टलिस्टपछि छनोट प्रक्रियाका अन्य चरण अगाडि बढाइने जनाइएको छ ।

सुदूरपश्चिममा स्वास्थ्य शिक्षाको पहुँच विस्तार तथा विशेषज्ञ जनशक्ति उत्पादन गर्ने लक्ष्यसहित स्थापना प्रक्रिया अघि बढाइएको विश्वविद्यालयमा नेतृत्व चयनलाई चासोका साथ हेरिएको छ ।