नौ महिनामा एक हजारभन्दा बढीको शल्यक्रिया

बागलुङ– धौलागिरि प्रादेशिक अस्पताल बागलुङमा विशेषज्ञ सेवा विस्तारसँगै बिरामीको चाप उल्लेख्य रूपमा बढ्दै गएको छ। अञ्चल अस्पताललाई गण्डकी प्रदेश सरकारले स्तरोन्नति गरी प्रादेशिक अस्पताल बनाएपछि यहाँ उपचारका लागि आउने बिरामीको संख्या निरन्तर बढिरहेको हो।

अस्पतालले अहिले चौबिसै घण्टा आकस्मिक सेवा, साना–ठूला शल्यक्रिया तथा विभिन्न विशेषज्ञ सेवाहरू प्रभावकारी रूपमा सञ्चालन गर्दै आएको छ। पहिले सामान्य शल्यक्रियाका लागि समेत पोखरा जानुपर्ने बाध्यता रहेकामा अहिले जटिल शल्यक्रिया समेत यहीँ गर्न सकिने अवस्था बनेको अस्पतालले जनाएको छ।अस्पतालका मेडिकल रेकर्डर नवराज पौडेलका अनुसार गत साउनदेखि हालसम्म १ हजार ४३ जनाको शल्यक्रिया गरिएको छ। तीमध्ये १०० जनाको हाडजोर्नीसम्बन्धी प्रमुख अपरेशन गरिएको छ भने १९ जना आङ खसेका महिलाको शल्यक्रिया गरिएको छ।

त्यस्तै, १८ जनाको पित्तथैली, ३५ जनाको एपेन्डिक्स, ३५ जनाको हर्निया र ५ जनाको हाइड्रोसिलको शल्यक्रिया गरिएको छ। मिनिल्याप विधिबाट २५ जनाको शल्यक्रिया, २ जनाको भ्यासेक्टोमी, १७९ जना गर्भवती सम्बन्धी तथा ३ जना इक्टोपिक केसको शल्यक्रिया गरिएको पनि अस्पतालले जनाएको छ।

यस अवधिमा २०९ वटा जनरल सर्जरी, १२० वटा हाडजोर्नीसम्बन्धी मध्यम तथा साना शल्यक्रिया र ३९७ वटा विभिन्न रोगका सामान्य शल्यक्रिया गरिएको पौडेलले जानकारी दिए। त्यसमध्ये १०३ जना बिरामीको दुरबिन प्रविधिबाट शल्यक्रिया गरिएको छ। अस्पतालप्रति बिरामीको विश्वास बढेसँगै उपचारका लागि आउनेको चाप पनि उल्लेख्य रूपमा वृद्धि भएको अस्पतालका मेडिकल सुपरिन्टेन्डेन्ट डा. किरण तिवारीले बताएका छन्।