मेरिट प्रणालीमा स्वास्थ्य संस्थाको नेतृत्व चयन गर्ने सरकारको स्पष्ट सन्देश

काठमाडौं । सरकारले देशका प्रमुख स्वास्थ्य विज्ञान प्रतिष्ठान, अस्पताल तथा स्वास्थ्यसम्बन्धी बोर्डहरूको नेतृत्व अब पूर्ण रूपमा योग्यता र प्रतिस्पर्धाका आधारमा चयन गर्ने स्पष्ट नीति सार्वजनिक गरेको छ । स्वास्थ्य तथा जनसंख्या मन्त्रालयले खुला प्रतिस्पर्धामार्फत सक्षम र योग्य व्यक्तिलाई मात्रै नेतृत्वमा नियुक्त गरिने जनाएको हो ।

हालै जारी गरिएको सार्वजनिक पदाधिकारीको पदमुक्तिसम्बन्धी विशेष व्यवस्थाको अध्यादेशपछि विभिन्न स्वास्थ्य संस्थाहरू नेतृत्वविहीन बनेका थिए । यसले उपचार सेवा, प्रशासनिक काम तथा दैनिक सेवा प्रवाह प्रभावित हुन सक्ने अवस्था देखिएपछि मन्त्रालयले तत्कालका लागि निमित्त प्रमुख नियुक्त गरेको स्पष्ट पारेको छ ।

मन्त्रालयका अनुसार यी नियुक्ति स्थायी नभई केवल सेवा सञ्चालन निरन्तर राख्न गरिएको अल्पकालीन व्यवस्था हो । सरकार स्वास्थ्य क्षेत्रमा सुधार, पारदर्शिता र सुशासन कायम गर्न प्रतिबद्ध रहेको भन्दै अब नेतृत्व चयन पूर्ण रूपमा मेरिट सिस्टममा आधारित हुने जनाएको छ ।

मन्त्रालयले छिट्टै खुला प्रतिस्पर्धा आह्वान गरी पूर्णकालीन पदाधिकारी नियुक्त गर्ने तयारी भइरहेको पनि जानकारी दिएको छ ।

निमित्त जिम्मेवारी पाएका पदाधिकारीहरू
बिर अस्पताल — प्रा. डा. प्रभा कोईराला
पाटन स्वास्थ्य विज्ञान प्रतिष्ठान — प्रा.डा. समिता पन्त
पोखरा स्वास्थ्य विज्ञान प्रतिष्ठान — डा. नरेन्द्र विक्रम गुरुङ
कर्णाली स्वास्थ्य विज्ञान प्रतिष्ठान — सह–प्रा.डा. विनम्र विष्ट
बीपी कोइराला स्वास्थ्य विज्ञान प्रतिष्ठान — सह–प्रा.डा. इन्द्र लिम्बु
राप्ती स्वास्थ्य विज्ञान प्रतिष्ठान — सह–प्रा.डा. सुरेश रसाइली
बीपी कोइराला मेमोरियल क्यान्सर अस्पताल — डा. उमेश नेपाल
सहिद गंगालाल राष्ट्रिय हृदय केन्द्र — सह–प्रा.डा. रविन्द्रभक्त तिमला
स्वास्थ्य बिमा बोर्ड — शकुन्तला प्रजापति

स्वास्थ्य मन्त्रालयको यो कदमलाई स्वास्थ्य क्षेत्रमा पारदर्शी नेतृत्व चयन, संस्थागत सुधार र सेवा प्रभावकारिता बढाउने दिशामा महत्वपूर्ण पहलका रूपमा हेरिएको छ ।