एफईएसजीई उपाधि पाउने पहिलो नेपाली बने डा. झा

काठमाडौँ। नेपाली चिकित्सक डा. राकेश कुमार झा युरोपियन सोसाइटी अफ ग्यास्ट्रोइन्टेस्टाइनल एन्डोस्कोपीबाट एफईएसजीई उपाधि (डिग्री) प्राप्त गर्न सफल भएका छन् । डा. झा एफईएसजीई को डिग्री प्राप्त गर्ने पहिलो नेपाली चिकित्सक हुन् ।

ईएसजीईबाट पहिलोपटक एसियाली राष्ट्रका दुई जना डक्टरले यो डिग्री पाएका छन् । नेपालका डा. झासँगै भारत (एआईजी) का नागेश्वर रेड्डीले पनि एफईएसजीई डिग्रीको उपाधी पाएका हुन् ।

डा. झा वीरगन्जस्थित ग्यास्ट्रो लिभर क्लिनिक इन्डोस्कोपी सेन्टरका संचालक हुन् । ग्यास्ट्रोइन्टेस्टाइनल एन्डोस्कोपीको क्षेत्रमा अनुसन्धान, व्यवसायिक सेवा, शिक्षा तथा क्लिनिकल सेवामार्फत महत्वपूर्ण व्यवसायिक उपलब्धी र उत्कृष्ट दक्षताप्राप्त गरेका व्यक्तिलाई यो डिग्री प्रदान गरिन्छ ।

आफ्नो पेशागत यात्रामा यो एफईएसजीई डिग्रीलाई एउटा महत्वपूर्ण उपलब्धि ठानेका डा. झाले यो उपाधी विश्व–चिकित्सा क्षेत्रमा नेपाललाई जोड्न र चिनाउन सहयोगी सिद्ध हुने विश्वास पनि व्यक्त गरेका छन् ।

डा. झा भन्छन्, ‘एफईएसजीई उपाधि मेरा लागि मात्र नभई देशकै लागि गर्वको कुरा हो । यसले विश्व–चिकित्सा क्षेत्रमा नेपालको परिचय स्थापित गर्न मद्दत पुर्‍याँउछ ।’

यो डिग्री प्राप्त गर्न ईएसजीईमा कम्तीमा १० वर्ष आबद्ध हुनुका साथै मोड्युल–१ र मोड्युल–२ सफलतापूर्वक पूरा गरेको हुनुपर्छ ।

डा. झाले जेनरल इन्फर्मरी लिड्स् युनिभर्सिटी युकेबाट सन् २०१३ मा मोड्युल–१ र एसियन इन्स्टिच्युट अफ ग्यास्ट्रोइन्टेरोलोजी हैदरावाद, भारतबाट सन् २०१७ मा मोड्युल–२ पूरा गरेका हुन्। यो वर्ष ईएसजीईबाट डा। झासहित १२ जनाले यो डिग्री प्राप्त गरेका छन् ।