स्वास्थ्य मन्त्रालयले विभिन्न परिषद्को पदाधिकारी नियुक्तिका लागि दोस्रो पटक निकाल्यो सूचना

काठमाडौं । स्वास्थ्य तथा खाद्य स्वच्छता मन्त्रालयले विभिन्न परिषद्मा रिक्त रहेका पदाधिकारी पदपूर्तिका लागि आवेदन आह्वान गरेको छ ।

मन्त्रालयले मंगलबार सूचना जारी गर्दै नेपाल आयुर्वेद चिकित्सा परिषद्, नेपाल स्वास्थ्य अनुसन्धान परिषद्, नेपाल नर्सिङ परिषद्, नेपाल स्वास्थ्य व्यवसायी परिषद्, नेपाल फार्मेसी परिषद्, नेपाल मेडिकल काउन्सिल, शहीद गंगालाल राष्ट्रिय हृदय केन्द्र र स्वास्थ्य बीमा बोर्डमा रिक्त पदहरूका लागि योग्य नेपाली नागरिकबाट आवेदन माग गरेको जनाएको छ ।

सूचनाअनुसार नेपाल आयुर्वेद चिकित्सा परिषद्मा अध्यक्ष १ र सदस्य २, नेपाल स्वास्थ्य अनुसन्धान परिषद्मा सदस्य २ र सदस्य–सचिव १, नेपाल नर्सिङ परिषद्मा अध्यक्ष १, उपाध्यक्ष १ र सदस्य १ तथा नेपाल स्वास्थ्य व्यवसायी परिषद्मा अध्यक्ष १ र सदस्य २ जना नियुक्त गरिनेछ ।

त्यस्तै, नेपाल फार्मेसी परिषद्मा अध्यक्ष १ र रजिस्ट्रार १, नेपाल मेडिकल काउन्सिलमा अध्यक्ष १ र सदस्य १, शहीद गंगालाल राष्ट्रिय हृदय केन्द्रमा कार्यकारी निर्देशक १ तथा स्वास्थ्य बीमा बोर्डमा अध्यक्ष १ र कार्यकारी निर्देशक १ पदका लागि आवेदन खुला गरिएको मन्त्रालयले जनाएको छ ।

मन्त्रालयका अनुसार इच्छुक तथा योग्यता पुगेका उम्मेदवारहरूले सूचना प्रकाशित भएको मितिले १० दिनभित्र मन्त्रालयले उपलब्ध गराएको अनलाइन लिंकमार्फत आवेदन दिन सक्नेछन् । आवेदनसँग पेश गर्नुपर्ने आवश्यक कागजातहरूको विवरण मन्त्रालयको आधिकारिक वेबसाइटमा राखिएको जनाइएको छ ।