सुदूरपश्चिममै पहिलो पटक विशिष्टीकृत प्रयोगशाला सेवा, धनगढीको नमुना संकलन केन्द्रमा बिरामीको आकर्षण बढ्दो

धनगढी । सुदूरपश्चिम प्रदेशको स्वास्थ्य क्षेत्रमा पहिलो पटक सरकारी स्तरबाट विशिष्टीकृत प्रयोगशाला सेवा सञ्चालनमा आएपछि धनगढीस्थित नमुना संकलन केन्द्रमा सेवाग्राहीको आकर्षण उल्लेख्य रूपमा बढ्न थालेको छ ।

प्रदेश जनस्वास्थ्य प्रयोगशाला, धनगढी कैलालीले सेवाग्राहीको सहज पहुँच र सुविधालाई ध्यानमा राख्दै स्वास्थ्य कार्यालय कैलालीको भवनमा नमुना संकलन केन्द्र (स्याम्पल कलेक्सन सेन्टर) सञ्चालन गरेपछि जटिल प्रकृतिका परीक्षण गराउने बिरामीहरूको संख्या बढ्दै गएको हो ।

सुदूरपश्चिम प्रदेशमै पहिलो पटक सरकारी तहबाट अत्यन्तै सुलभ शुल्कमा जटिल तथा विशिष्टीकृत स्वास्थ्य परीक्षण सेवा उपलब्ध हुन थालेपछि यो केन्द्र सर्वसाधारणको भरोसायोग्य गन्तव्य बन्न थालेको छ। यसअघि निजी अस्पताल तथा महँगा प्रयोगशालामा हजारौँ रुपैयाँ खर्च गर्नुपर्ने परीक्षण अब सरकारी सेवामार्फत सहज र कम शुल्कमा उपलब्ध हुन थालेको छ ।

प्रयोगशालाले हाल अत्याधुनिक प्रविधिमा आधारित विभिन्न विशिष्टीकृत परीक्षण सञ्चालन गरिरहेको छ । जसअन्तर्गत एचसीभी भाइरल लोडमार्फत हेपाटाइटिस ‘सी’ भाइरसको मात्रा पत्ता लगाउने, एचबीभी भाइरल लोडबाट हेपाटाइटिस ‘बी’ भाइरसको अवस्था परीक्षण गर्ने, एचएलए–बी२७ मार्फत बाथरोग तथा मेरुदण्ड सम्बन्धी समस्या पहिचान गर्ने सेवा उपलब्ध छ ।

त्यसैगरी एचपीभी डीएनए परीक्षणबाट पाठेघरको मुखको क्यान्सरको जोखिम पहिचान गर्न सकिने तथा एचबी इलेक्ट्रोफोरेसिसमार्फत थालासेमियालगायत रगतसम्बन्धी जन्मजात रोग पहिचान गरिने प्रयोगशालाले जनाएको छ ।
यसअघि यस्ता विशिष्टीकृत परीक्षणका लागि सुदूरपश्चिमका बिरामीहरूलाई काठमाडौं वा छिमेकी मुलुक भारतका विभिन्न सहर धाउनुपर्ने बाध्यता थियो ।

तर, प्रदेश जनस्वास्थ्य प्रयोगशालाले स्वास्थ्य कार्यालय कैलालीको कोभिड अस्पताल पछाडि रहेकोस्वास्थ्य कार्यालय कैलालीको भवनको कोठा नम्बर १२ मा नमुना संकलन केन्द्र सञ्चालनमा ल्याएपछि बिरामीहरूलाई समय, खर्च र झन्झटबाट राहत पुगेको छ ।

सुलभ शुल्क, सहज पहुँच र प्रदेशमै पहिलो पटक उपलब्ध भएको विशिष्टीकृत सेवाका कारण धनगढीको उक्त केन्द्रमा बिरामीको आकर्षण दिनप्रतिदिन बढ्दै गएको सरोकारवालाहरू बताउँछन् ।