मन्त्री रानाको पहिलो निर्णयः चिकित्सकका लागि आधारभूत अल्ट्रासाउन्ड तालिमको पाठ्यक्रम स्वीकृत

धनगढी । सुदूरपश्चिम प्रदेशका नव नियुक्त सामाजिक विकास मन्त्री बेलबहादुर रानाले पदभार ग्रहणसँगै स्वास्थ्य सेवा सुधारसँग जोडिएको पहिलो निर्णय गरेका छन् । मन्त्री रानाले चिकित्सकका लागि आधारभूत अल्ट्रासाउन्ड तालिमको पाठ्यक्रम स्वीकृत गर्ने निर्णय गरेका हुन् । सोमबार शपथ ग्रहणपछि मन्त्रालयमा पदभार सम्हाल्दै मन्त्री रानाले उक्त निर्णय गरेका हुन् ।

सामाजिक विकास मन्त्रालयका अनुसार सुदूरपश्चिम प्रदेशमा कार्यरत मेडिकल अधिकृत तथा आयुर्वेद चिकित्सकलाई आधारभूत अल्ट्रासाउन्ड सेवा सम्बन्धी तालिम प्रदान गर्न आवश्यक पाठ्यक्रम स्वीकृत गरिएको हो । मन्त्रालयले यस निर्णयले प्रदेशका स्वास्थ्य संस्थामा कार्यरत चिकित्सकको क्षमता अभिवृद्धि हुने र दुर्गम क्षेत्रसम्म आधारभूत स्वास्थ्य सेवाको पहुँच विस्तारमा सहयोग पुग्ने विश्वास लिएको छ ।

विशेषगरी गर्भवती महिलाको स्वास्थ्य परीक्षण, पेट तथा अन्य सामान्य स्वास्थ्य समस्याको प्रारम्भिक परीक्षणमा अल्ट्रासाउन्ड सेवाको प्रभावकारी उपयोग बढ्ने अपेक्षा गरिएको छ । सुदूरपश्चिममा स्वास्थ्य सेवामा विशेषज्ञ जनशक्ति अभाव रहेको अवस्थामा चिकित्सकलाई अतिरिक्त सीपयुक्त बनाउने उद्देश्यसहित यो कार्यक्रम अघि बढाइएको मन्त्रालयको भनाइ छ ।

तालिम सञ्चालनपछि प्रदेशका अस्पताल तथा स्वास्थ्य संस्थाबाट सेवाग्राहीले स्थानीय स्तरमै सहज र छिटो सेवा पाउने अपेक्षा गरिएको छ । प्रदेश सरकारमा मन्त्री हेरफेरपछि सामाजिक विकास मन्त्रालयको जिम्मेवारी पाएका रानाको यो निर्णयलाई स्वास्थ्य क्षेत्र सुधारतर्फको सुरुवाती कदमका रूपमा हेरिएको छ ।