सुदूरपश्चिममा मन्त्रिपरिषद् पुनर्गठनः बेलबहादुर राना सामाजिक विकास मन्त्री नियुक्त

धनगढी । सुदूरपश्चिम प्रदेश सरकारमा मन्त्रिपरिषद् पुनर्गठन गरिएको छ । मुख्यमन्त्री कमल बहादुर शाहले नयाँ मन्त्री नियुक्त गरेसँगै सोमबार नवनियुक्त मन्त्री तथा राज्यमन्त्रीहरूले प्रदेश प्रमुखसमक्ष पद तथा गोपनीयताको शपथ लिएका छन् ।

पुनर्गठनअनुसार बेलबहादुर रानाले सामाजिक विकास मन्त्रीको जिम्मेवारी पाएका छन् भने मधु भारती सामाजिक विकास राज्यमन्त्री नियुक्त भएकी छन् । यसैगरी, विक्रम सिंह धामी आर्थिक मामिला मन्त्री नियुक्त भएका छन् भने मानबहादुर रावलले उद्योग, पर्यटन, वन तथा वातावरण मन्त्रालयको जिम्मेवारी पाएका छन् । जुना दानीले आर्थिक मामिला राज्यमन्त्रीको जिम्मेवारी सम्हालेकी छन् ।

सुदूरपश्चिम प्रदेशमा हाल नेकपा (एमाले) र नेपाली कांग्रेसको गठबन्धन सरकार रहेको छ । कांग्रेसले आफ्ना मन्त्रीहरूलाई फिर्ता बोलाएर नयाँ नेतृत्वलाई जिम्मेवारी दिएपछि मन्त्रिपरिषद्मा हेरफेर गरिएको हो । नवनियुक्त मन्त्रीहरूले शपथग्रहणपछि मन्त्रालयको कार्यभार सम्हालेका छन् ।

सामाजिक विकास मन्त्रालय अन्तर्गत स्वास्थ्य, शिक्षा, खेलकुद तथा सामाजिक क्षेत्रका महत्वपूर्ण जिम्मेवारी रहने भएकाले नयाँ नेतृत्वको कार्यसम्पादनलाई चासोका साथ हेरिएको छ ।