सुदूरपश्चिम प्रादेशिक आयुर्वेद चिकित्सालयले आफ्नै औषधि उत्पादन गर्ने

धनगढी । सुदूरपश्चिम प्रदेश सरकार मातहत रहेको प्रादेशिक आयुर्वेद चिकित्सालयले अब आफ्नै आयुर्वेदिक औषधि उत्पादन गर्ने तयारी अघि बढाएको छ । चिकित्सालयले औषधि उत्पादनका लागि आवश्यक कच्चा पदार्थ खरिद प्रक्रियासमेत अगाडि बढाइसकेको जनाएको छ । चिकित्सालयका सूचना अधिकारी सुरेन्द्र बहादुर शाहीका अनुसार प्रारम्भिक चरणमा आयुर्वेदिक तेल र चूर्ण उत्पादन गरिनेछ । उनका अनुसार उत्पादनका लागि करिब ३० लाख रुपैयाँ बराबरका आवश्यक सामग्री खरिद प्रक्रिया सुरु गरिएको हो । चिकित्सालयले आफ्नै उत्पादन सुरु गरेसँगै स्थानीयस्तरमै गुणस्तरीय आयुर्वेदिक औषधि उपलब्ध गराउन सहज हुने विश्वास गरिएको छ । साथै यसबाट आयुर्वेद सेवाको विस्तार र बिरामीलाई सहज उपचार सेवा प्रदान गर्न थप सहयोग पुग्ने अपेक्षा गरिएको छ । यसैबीच, सुदूरपश्चिम प्रदेश सरकारले प्रादेशिक आयुर्वेद चिकित्सालयलाई आयुर्वेद प्रतिष्ठानका रूपमा विकास गर्ने उद्देश्यले ऐन ल्याएको भए पनि हालसम्म त्यसको  कार्यान्वयन हुन सकेको छैन । चिकित्सालयले भने सेवा विस्तार र औषधि उत्पादनमार्फत संस्थालाई थप सुदृढ बनाउने तयारी गरिरहेको जनाएको छ ।