शहीद दशरथ चन्द स्वास्थ्य विज्ञान विश्वविद्यालयमा पदाधिकारी सिफारिस समिति गठन गर्न सिनेट बैठक बस्दै

धनगढी । सरकारले अध्यादेशमार्फत सबै विश्वविद्यालयका पदाधिकारीहरूको नियुक्ति खारेज गरेपछि नयाँ पदाधिकारी नियुक्तिको प्रक्रिया अघि बढाउन शहीद दशरथ चन्द स्वास्थ्य विज्ञान विश्वविद्यालयको सिनेट बैठक बस्न लागेको छ । विश्वविद्यालय ऐनअनुसार उपकुलपति र रजिष्ट्रार नियुक्तिका लागि सिफारिस समिति गठन गर्नुपर्ने व्यवस्था रहेको छ । सोहीअनुसार भोली बस्ने सिनेट बैठकले सिफारिस समिति गठन गर्नेछ ।

शिक्षा मन्त्रालयले बुधबार बिहान ११ बजे सिनेट बैठक बस्ने जनाएको छ । यसअघि शिक्षा मन्त्रालयले वैशाख २५ गते स्वास्थ्य विज्ञान विश्वविद्यालयबाहेक अन्य ९ विश्वविद्यालयका उपकुलपति नियुक्तिका लागि नाम सिफारिस गर्न छनोट तथा सिफारिस समितिमा दरखास्त आह्वान गरेको थियो ।

अध्यादेशमार्फत ऐन संशोधन
सरकारले केही विश्वविद्यालयसम्बन्धी ऐन संशोधन गर्न ल्याएको अध्यादेशमार्फत शहीद दशरथ चन्द स्वास्थ्य विज्ञान विश्वविद्यालयको ऐनमा समेत संशोधन गरेको छ । विश्वविद्यालय ऐनमा व्यवस्था गरिएका चार वटा दफा संशोधन गरिएको छ । अध्यादेशअनुसार दफा २३ को उपदफा (२) हटाइएको छ, जसमा उपकुलपतिको पदावधि तथा पुनःनियुक्ति गर्न सकिने व्यवस्था उल्लेख थियो ।

त्यस्तै, दफा २४ को खण्ड (च) मा रहेको ‘उपकुलपति नियुक्त हुँदा ६१ वर्ष ननाघेको हुनुपर्ने’ व्यवस्था पनि हटाइएको छ । यसैगरी, ऐनको दफा २७ को उपदफा (३) हटाइएको छ । उक्त व्यवस्थामा रजिष्ट्रारको पदावधि चार वर्षको हुने र कार्यसम्पादन सन्तोषजनक देखिएमा पुनःनियुक्ति गर्न सकिने प्रावधान थियो ।

विश्वविद्यालय ऐनबाट दफा ३५ समेत हटाइएको छ । यस दफामा उपकुलपति तथा रजिष्ट्रारले पदीय जिम्मेवारी पूरा नगरेमा हटाउन कुलपतिसमक्ष निवेदन दिन सकिने तथा छानबिन समिति गठन गर्ने व्यवस्था रहेको थियो ।