शहीद दशरथ चन्द स्वास्थ्य विज्ञान विश्वविद्यालयले सार्वजनिक गर्‍यो १०० दिनको प्रगति विवरण

धनगढी । शहीद दशरथ चन्द स्वास्थ्य विज्ञान विश्वविद्यालयले आफ्नो स्थापना र नेतृत्व चयनपछिको पहिलो १०० दिनको प्रगति विवरण सार्वजनिक गरेको छ । उपकुलपति प्रा. डा. सुनील कुमार जोशी र रजिस्ट्रार डा. खेमराज जोशीले पदभार ग्रहण गरेयता विश्वविद्यालयले संस्थागत संरचना, शैक्षिक तयारी र पूर्वाधार विकासमा उल्लेख्य उपलब्धि हासिल गरेको दाबी गरिएको छ ।

गएको वैशाख २३ गते उपकुलपति र रजिस्ट्रारको नियुक्तिसँगै विश्वविद्यालयले आफ्नो प्रशासनिक र प्राज्ञिक यात्रा औपचारिक रूपमा सुरु गरेको थियो । यस अवधिमा विश्वविद्यालयले ‘शहीद दशरथ चन्द स्वास्थ्य विज्ञान विश्वविद्यालय ऐन, २०८२’ बमोजिम संगठन तथा व्यवस्थापन सर्वेक्षण सम्पन्न गरी अर्थ मन्त्रालयबाट स्वीकृति समेत प्राप्त गरिसकेको छ ।

विश्वविद्यालयको चौथो सभाले शिक्षक तथा कर्मचारी नियमावली, आर्थिक कार्यविधि, खरिद नियमावली, र अनुसन्धान केन्द्र नियमावली जस्ता महत्वपूर्ण कानुनी दस्तावेजहरू पारित गर्दै संस्थागत सुशासनको बलियो आधार खडा गरेको छ ।

विश्वविद्यालयले चिकित्सा शिक्षाका विभिन्न विधामा पठनपाठन सुरु गर्न तीव्रताका साथ काम अघि बढाएको छ । यसै सिलसिलामा एमबीबीएस, बिडिएस, नर्सिङ, फिजियोथेरापी, फार्मेसी, जनस्वास्थ्य र अप्टोमेट्री कार्यक्रमहरूको पाठ्यक्रम मस्यौदा तयार गर्न समितिहरू गठन गरिएका छन् ।

विश्वविद्यालयको योजना अनुसार आर्थिक वर्ष २०८३/०८४ देखि ५० सिट एमबीबीएस, ३० सिट नर्सिङ, २० सिट ल्याब टेक्नोलोजी र २० सिट अप्टोमेट्रीका कार्यक्रमहरू सञ्चालन गर्ने लक्ष्य राखिएको छ । यसका लागि चिकित्सा शिक्षा आयोगमा ‘सेल्फ–अप्रेजल फर्म’ समेत पेस भइसकेको छ ।

विश्वविद्यालयलाई आवश्यक पर्ने प्राज्ञिक जनशक्ति जुटाउन ७७ जना प्राध्यापक, सह–प्राध्यापक र उप–प्राध्यापक पदका लागि विज्ञापन प्रकाशन गरिएको छ । निर्वाचन आयोगको अनुमति प्राप्त गरी सुरु गरिएको यो प्रक्रियाले दक्ष जनशक्ति अभावलाई समाधान गर्ने विश्वास लिइएको छ । साथै, करार शिक्षक छनोटका लागि कार्यविधि समेत निर्माण गरिएको छ ।

विश्वविद्यालयले हाल सञ्चालनमा रहेको शिक्षण अस्पताललाई ३०० बेडमा स्तरोन्नति गर्ने योजना अघि सारेको छ । यसका साथै दुर्गम क्षेत्रका नागरिकलाई स्वास्थ्य सेवा पु¥याउन ‘स्याटेलाइट हेल्थ सेन्टर’ स्थापना गर्ने, टेलिमेडिसिन सेवा सुरु गर्ने र ‘क्याथ ल्याब’ जस्ता विशिष्टीकृत सेवा सञ्चालन गर्ने तयारी गरेको छ ।

विश्वविद्यालयले चालू आर्थिक वर्ष २०८२/८३ का लागि ४९ करोड १३ लाख रुपैयाँको बजेट परिचालन गरिरहेको छ भने आगामी आर्थिक वर्षका लागि २ अर्ब ५३ करोड रुपैयाँको महत्त्वाकांक्षी बजेट प्रस्ताव गरेको छ । विद्यार्थीहरूका लागि खुसीको खबर यो छ कि विश्वविद्यालयले ७५ प्रतिशत छात्रवृत्ति सुनिश्चित गर्न पहल गरिरहेको छ, जसका लागि ७.३१ करोड रुपैयाँ सुनिश्चित भइसकेको छ । यसले जेहेन्दार र न्यून आय भएका विद्यार्थीलाई चिकित्सा शिक्षामा पहुँच पु¥याउनेछ ।

विश्वविद्यालयले संघीय सरकार, सुदूरपश्चिम प्रदेश सरकार र स्थानीय तहका अस्पतालहरूसँग समन्वय गरी प्रयोगात्मक अभ्यास र सेवा विस्तारका लागि सम्झौताको प्रक्रिया अघि बढाएको छ । यो १०० दिनको उपलब्धिले दशकौंदेखि गेटामा स्वास्थ्य विश्वविद्यालयको पर्खाइमा रहेका सुदूरपश्चिमवासी र समग्र नेपालीमा नयाँ आशा जगाएको छ ।