कैलालीमा १० हजारभन्दा बढी बालिकालाई एचपीभी खोप लगाइँदै

धनगढी । सुदूरपश्चिम प्रदेशकै सबैभन्दा बढी जनघनत्व भएको कैलाली जिल्लामा पाठेघरको मुखको क्यान्सरविरुद्ध १० हजारभन्दा बढी बालिकालाई लक्षित गरी खोप अभियान सञ्चालन गरिने भएको छ ।

स्वास्थ्य कार्यालय कैलालीका अनुसार माघ २७ गतेदेखि जिल्लाभरका १ उपमहानगरपालिका, ६ नगरपालिका र ६ गाउँपालिकाका विभिन्न खोप केन्द्र तथा विद्यालयहरूबाट कुल १० हजार ३ सय ४५ बालिकालाई एचपीभी खोप लगाइने छ ।

खोप कार्यक्रम अन्तर्गत कक्षा ६ मा अध्ययनरत ९ हजार ७ सय २० बालिका, विद्यालय नजाने १० वर्ष उमेर समूहका १ सय ६३ बालिका तथा गत वर्ष खोप लगाउन छुटेका कक्षा ७ देखि १० सम्म अध्ययनरत ३ सय ६३ बालिकालाई खोप दिइने स्वास्थ्य कार्यालयले जनाएको छ ।

स्थानिय तहअनुसार सबैभन्दा धेरै धनगढी उपमहानगरपालिकामा २ हजार ३ सय ४० बालिकालाई खोप दिइने छ ।

त्यसपछि गोदावरी नगरपालिकामा १ हजार ३ सय ९३, लम्कीचुहा नगरपालिकामा १ हजार १ सय २१, घोडाघोडी नगरपालिकामा १ हजार ५०, टिकापुर नगरपालिकामा ९ सय ५१, गौरीगंगा नगरपालिकामा ७ सय ४५ र भजनी नगरपालिकामा ५ सय ४१ बालिकालाई खोप दिइनेछ ।

त्यसैगरी गाउँपालिकातर्फ बर्दगोरिया गाउँपालिकामा ५ सय ६५, कैलारी गाउँपालिकामा ३ सय ६६, जानकी गाउँपालिकामा ३ सय ६५, जोशीपुर गाउँपालिकामा ३ सय ४०, चुरे गाउँपालिकामा २ सय ९८ र मोहन्याल गाउँपालिकामा २ सय ७० बालिकालाई पाठेघरको मुखको क्यान्सरविरुद्ध खोप दिइने स्वास्थ्य कार्यालयले जानकारी दिएको छ । खोप कार्यक्रम सफल बनाउन जिल्लाभर ४ सय २९ वटा खोप केन्द्र तोकिएका छन् ।

ती केन्द्रहरूमा ३ सय ८८ जना स्वास्थ्यकर्मी र ३ सय ८८ जना स्वयंसेवक खटाइने तयारी गरिएको छ । स्वास्थ्य कार्यालय कैलालीका अनुसार गत आर्थिक वर्ष २०८१/०८२ मा जिल्लामा ४७ हजार ६ सय ५५ बालिकालाई पाठेघरको मुखको क्यान्सरविरुद्ध खोप लगाइएको थियो ।

यस वर्ष अघिल्लो वर्षको अनुभवलाई आधार मानेर खोप अभियानलाई अझ प्रभावकारी र व्यवस्थित बनाइने कार्यालयले जनाएको छ